টুডু ‍আর বেঁসরা কওয়াঃ কৗইজৗ কাথা | tudu ar besra kaija katha

বেঁসরা পৗরিস রেন হড় ক দ "চৗই গাড়" তাঁহে কান তাকয়া, নওয়া চৗয় গাড়রে বেঁসরা ক দ দিনৗম গে রৗস্কৗ রমজ লৗগিত লাঁগড়ে এনেজ সেরেঞ আঁখরা ক জড়াও তাঁহে,বেঁসরা কওয়া নওয়া রৗস্কৗ ঞেলতে সুর সুপুর গাড় রেন আয়ম হড় নওয়া এনেজ সেরেঞ ঞেল লৗগিত ক হিজুঃ তাঁহে। অনকাগে মিৎদিন ছতর পতি কিস্কু রাজ হপন- বৗবুরায় আর আজরেন গাতে মাডে রায় তাকিন নওয়া চৗয় গাড় তেকিন হেজলেন রে বির বিক্রম বৗহু গৗউচ খৗতির বৗবুরায় দ লুতুর এ পেটের হচলেনা। বৗবুরায় অনা লুটুর পেটের হৗসু আর অপমান রেয়াঃ বদলা হাতাও লৗগিৎ দঁসার ধাঁও চৗয় গাড় হড় দং ক এনেজ অক্তরে বির বিক্রম বৗহু অরলেদেয়া। সাঁওতে বারয়া টুডু কড়া বেঁসরা কুড়ি কিন অরলেদ কিনা। উনরে বৗবু রায় দ জাহা লেকারে পুচুই হঁচলেন রে হঁ টুডু কড়া দকিন সাঁব হচ এনা। বেঁসরা কড়া ক দ উনকিন টুডু কড়া দাল গজ কাতে বিরসেঁদ রেক গিডি হট কাদকিনা ক।

টুডু করেন হড় ক বাডায় ঞাম কেদা বাংম বেঁসরা ক ভুক্ত আর বিরাম দাল গজ কাতেৎ বির রেক গিডি আকাৎ কিনা, নওয়া ঘটনা তায়ম টুডু ক অৗডি জর ক রাংগাও এনা। আর নওয়া রেনাঃ বিচৗর হাতাও লৗগিত ছতর পতি কিস্কু রাজ ঠেন ক সামাং এনা, নওয়া বিচৗর সঁলহে মাড়াং রেগে ছতর পতি কিস্কু রাজ দ  হপন তেদাঃ বৗড়িজ বেভার রেয়াঃ কৗহিস তে অরন বনতে চালাও এনা। খান গে চৗয় গাড় হড় কিস্কু রাজ অরন বনতে চালাও খৗতির বির বিক্রম বাদম রাজ লেকাতে ক তিঞগু কেদেয়া ক। ‍আর চৗয় গাড় রেনাঃ সিমৗ ক তল কেদা। সিমৗ তল অক্তে মান্ডে রায় হঁ ক তল মেসাই অক্ত টুডু আর বেঁসরা ক তালারে কাথা রাপাজাগ দ হয়লেন গেয়া,মেনখান টুডু ক দাঁড়ে অভাবতে বাংক তুপুৎ লেনা। অনা রেনাঃ রৗগি খৗতির টুডু ক চাম্পা রাজ বৗবুরায় সাঁও জুমিৎ কাতেৎ "তিলৗৎ টৗন্ডি" লৗড়হৗই রেক আঁড়গো লেনা। নওয়া লৗড়হৗই রেগে সানাম গাড় ক ধৗসুড় সৗরি লেনা।