ᱥᱟᱱ ᱥᱤᱸᱜᱟᱹᱲ|San Sigar Anroh

ᱟᱹᱭᱩᱵ ᱨᱟᱹᱱᱤ ᱡᱷᱟᱵᱟᱨᱟᱹᱞᱤ 

ᱥᱤᱸᱫᱩᱨ ᱠᱷᱟᱺᱰ ᱥᱟᱡᱽ 

ᱯᱚᱪᱷᱤᱢ ᱠᱚᱬᱨᱮᱭ ᱛᱮᱸᱜᱳᱭᱮᱱ

ᱥᱟᱢᱟᱱᱚᱢ ᱨᱤᱢᱤᱞ ᱛᱟᱡᱽ ᱾

ᱞᱤᱞ ᱨᱚᱝ ᱦᱚᱲᱢᱚ ᱱᱤᱯᱷᱩᱴᱜᱮ

ᱩᱵ ᱞᱩᱫᱽᱜᱩᱫ ᱞᱩᱫᱽᱜᱩᱫ

ᱢᱮᱸᱫ ᱢᱟ ᱠᱩᱴᱤ ᱧᱩᱛ ᱜᱟᱡᱟᱲ

ᱢᱟᱨᱟᱝ ᱫᱟᱹᱭ ᱱᱟᱹᱭᱩᱵ ᱾

ᱠᱮᱲᱮᱵ ᱨᱚᱴᱮ ᱜᱷᱩᱜᱽᱨᱤ

ᱩᱨᱩ ᱵᱷᱟᱱ ᱵᱷᱟᱱ

ᱟᱹᱭᱩᱵ ᱫᱟᱨᱟᱢ ᱥᱮᱥᱮᱨᱮᱧ 

ᱱᱟᱸᱫᱷᱟᱣᱮᱱᱟ ᱧᱟᱢᱮᱱ ᱾

ᱫᱟᱨᱮ ᱟᱥᱨᱟᱭ ᱴᱷᱮᱱ ᱛᱤᱭᱳᱜᱽ 

ᱠᱚᱸᱜ ᱨᱟᱹᱥᱠᱟᱹ ᱠᱩᱡᱩᱡ

ᱠᱟᱹᱦᱩ ᱠᱩᱬᱤᱫ ᱜᱤᱫᱤ

ᱠᱤᱥᱱᱤ ᱦᱩᱡ ᱦᱩᱢ ᱾

ᱜᱩᱯᱤᱠᱚ ᱥᱟᱶ ᱜᱟᱹᱭ ᱢᱮᱨᱚᱢ ᱦᱚᱲᱠᱚ ᱪᱟᱛᱚᱢ ᱜᱚᱜ

ᱨᱩᱣᱟᱹᱲ ᱠᱟᱱᱠᱚ ᱦᱳ ᱦᱟᱱᱠᱳ

ᱩᱢᱩᱞᱛᱮ ᱟᱲᱟᱜ ᱾ 

ᱪᱤᱯ ᱪᱤᱲᱤᱯ ᱥᱤᱢ ᱥᱩᱠᱨᱤ 

ᱯᱮᱸᱠ ᱯᱮᱸᱠ ᱜᱮᱰᱮᱠ

ᱱᱤᱨᱟᱹᱨ ᱵᱟᱲᱟ ᱠᱳᱞᱮᱨᱮ

ᱵᱚᱞᱚ ᱧᱟᱣᱟᱱᱠᱚ ᱾ 

ᱫᱟᱨᱮ ᱱᱟᱹᱲᱤ ᱢᱟ ᱱᱤᱡᱷᱩᱢ 

ᱥᱚᱛ ᱢᱟ ᱥᱟᱡ ᱥᱩᱡ 

ᱛᱳᱭᱳ ᱨᱩᱸᱰᱟᱹᱣᱟᱜ ᱟᱣᱛᱟᱱ

ᱪᱩᱸᱫᱽ ᱦᱚᱸ ᱪᱷᱩᱸᱡ ᱪᱷᱩᱸᱡ ᱾ 

(ᱠᱷᱟᱱ) ᱥᱟᱹᱨᱫᱤ ᱥᱟᱡᱮ ᱵᱚᱜᱫᱚᱞ ᱠᱟᱱ 

ᱟᱥ ᱡᱤᱨᱟᱹᱣ ᱧᱟᱢᱡᱚᱝ

ᱥᱤᱸᱫᱩᱨ ᱵᱚᱚᱫᱚᱞ ᱰᱟᱜᱽ ᱤᱯᱤᱞ 

ᱴᱤᱯᱼᱟᱱᱟᱭ ᱢᱚᱞᱚᱝ ᱾

(ᱟᱫᱚ) ᱪᱮᱲᱫᱷᱟ ᱨᱤᱢᱤᱞ ᱠᱟᱹᱨᱤᱫᱟᱝ

ᱡᱚᱨᱚ ᱠᱮᱫᱛᱟᱭ ᱫᱟᱜ-

ᱯᱩᱨᱩᱭᱟᱹ‌ ᱠᱷᱚᱱ ᱟᱯ ᱟᱹᱵᱩᱠ-

ᱡᱟᱸᱜᱮ ᱫᱟᱨᱟᱢ ᱫᱟᱜ ᱾ 

(ᱠᱷᱟᱱ) ᱵᱟᱹᱨᱩᱰᱟᱹᱝ ᱫᱚ ᱛᱩᱢᱮᱫᱟᱜ 

ᱨᱚᱴᱮ ᱢᱟ ᱴᱟᱢᱟᱠ 

ᱜᱷᱩᱜᱩᱨᱤ ᱩᱨᱩ ᱠᱩᱲᱤ

ᱡᱚᱢᱚᱠᱮ ᱡᱚᱢᱚᱠ ᱾