অনড়হেঁ বাহা ডালওয়াঃ|Anrhe baha dalwag|Paul Jujhar Soren

 'অনড়হেঁ বাহা ডালওয়াঃ' দ পাউল জুঝার সরেন অলাঃ অনড়হেঁ রেয়াঃ মিৎটেন তুনুমৗল পুথি কানা। নওয়া দ আচ্-আঃ সাধের অনড়হেঁ পুথি কানতায়া। ১৯৩৬ সালরে নওয়া পুথি দ পৗহিল ধাও ছাপা সদরলেনা। নওয়া পৗহিল সানাপড়াও  রেয়াঃ পুথিগে নিতোঃ আরই নাওয়া কারতে ড. সুহৃদকুমার ভৌমিক হতেতে ছাপা ওডোক এনা। অৗডি দিন খন নওয়া পুথি রেয়াঃ রেংগেচ্ পাপাড়হাওকোবোন বুঝৗও এৎ তাহে। ওনাতে নওয়া পুথি ছাপা দোহড়ায় লৗগিৎ ড. ভৌমিকাঃ কুরুমুটু দ অৗডি সারহাও লেক কান তায়া।

সানতালি সাঁওহেঁৎ রেয়াঃ নাগাম সেচ্ কয়ঃ লেখান বাডায় এ্যামোঃআ জে পাউল জুঝার সরেনঃ 'অনড়হেঁ বাহা ডালওয়াঃ' দ সানতালি সাঁওহেৎ রেয়াঃ পৗহিল উতৗর বুনিয়ৗদি সিরজন কানা। নাহাঃ সাঁওহেৎ রেয়াঃ এতহপ্ হঁ ওনা পুথি খনগে। পাউল জুঝার ঞুতুমতে অনড়হিঁয়ৗ সারদা প্রসাদ কিস্কু গংকে আঃ  অল -

কাড়াং ঞুতৗত ঞিদৗ অনা জখান

সের্মা-সৗড়িম রে চিলিয় জোলোঃ ??

সের্মা-সৗড়িম রেন সরেন ইপিল আমগে পাউল জুঝার ডিগিমিগি।

( পাউল জুঝার সরেন', গাম-গদার ) 

আচ্ কাথায়, তিনরে সানতালি সাঁওহেৎ-সংসার বে-ওনোরোম রেয়াঃ ঞুতরে উনুন আকান তাহেঁকানা উন দ সানতালি সাঁওহেৎ সেরমারে ডাগডাগ ইপিল লেকায় উপেললেনা পাউল জুঝার সরেন দ। আচ্-আঃ অনড়হেঁ পুথি দ ঝাক ঝাক সোনা বারাগ পুথি কানতায়া। নওয়া হুডিঞ পুথি দ সানতালি সাঁওহেৎ রে অৗডি উসুল ঠাঁওয়ে হামেট আকাওয়ানা। নওয়া পুথিরে সেলেৎ আকান অঃঅলিচ্-আঃ 'বিনতি' খন বাডায় এ্যামোঃআ জে "আবোরেন গিদরৗ কোকো চেদা মেনতে আর ইস্কুল কোরে নওয়া লেকান পুথি বৗনুঃতে, নওয়া হুডিঞ পুথি অলেনা।" নওয়া লাসাঁড়হেঁৎরে লৗই জৗরুড় কানা জে পাউল জুঝার দ উন বিদৗলরেন বিহার সরকার তৗরিরে জামতাড়া রেয়াঃ হড় ইস্কুলকোরেন নিসপেটার লেকাতেয়ে বাহাললেনা। ওনাতে হড় গিদরৗ কো অলঃ পাড়হাওঃ চেৎ-আকো লৗগিৎ মিংটেন দায়িকে গঃলেদা আর ভাগে সিকনৗত রেয়াঃ আহলা সেটেরা কো লৗগিৎ 'অনড়হেঁ বাহা ডালওয়াঃ' পুথি দয় অল লাঃয়া। তবে সিকনৗত রেয়াঃ গরজ হতেতে নওয়া পুথি রেয়াঃ অনড়হেঁৎ কো বেনাওলেন রেহঁ ওনাকোরে নিরৗ অনড়হেঁ রেয়াঃ মঞ্জতেৎ চাখা আটকার ক্রামোঃআ আর ওনাকোরেন অঃঅলিচ্ পাউল জুঝার হঁ অৗডি গৗখুড় কোবি মেনতে বোন লেখা দাড়েয়ায়া।

নওয়া পুথিরে জতরে ( ১৭ )গেয়ায় গোটাং অনড়হেঁ মেনাঃআ। বিসয় আর কোবি আঃ হুদিস আর কল্পনা রেয়াঃ ঢং লেকাতে অনড়হেঁ কো দ মুখিয়ৗ ভাবতে ( ৪) পোন হৗটিঞতে হৗটিঞ গানোঃআ- (ক) ইসোর সারহাওয়ে রেয়াঃ, (খ) জিয়ন-দরসন মেনাঃআন, (গ) সিরজন বাবততেয়াঃ আর (ঘ) সিখৗউনাওয়ানাঃ।

তথ্য সূত্র -

অনড়হেঁ বাহা ডালওয়াঃ পুথি