ᱦᱩᱞ ᱨᱮ | HULL RE |ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ

ᱥᱟ.ᱨᱫᱤᱭᱮᱱᱟ ᱥᱟᱦᱮᱵᱽ ᱛᱩᱞᱩᱡ ᱛᱟᱯᱟᱢ ᱛᱩᱯᱩᱫ
ᱟᱨᱦᱚᱸ ᱱᱚᱛᱮ ᱥᱟ.ᱨᱫᱤᱭᱟᱠᱟᱱ ᱡᱟᱨᱜᱮ ᱢᱟ.ᱯᱩᱫ᱾
ᱥᱟᱦᱮᱵᱽ ᱠᱚᱠᱚ ᱟᱛᱟᱨᱟᱫᱟ ᱡᱚᱛᱚ ᱚᱲᱟᱜ
ᱚᱱᱟ ᱛᱮᱲᱚᱝ ᱟᱥᱨᱟ ᱵᱟᱝ.ᱱᱩᱜ ᱡᱚᱛᱚ ᱦᱚᱲᱟᱜ ᱾
ᱮᱨᱟ ᱩᱨᱩ ᱜᱤᱭᱟ.ᱨ ᱯᱤᱫᱟ.ᱨ ᱢᱤᱦᱩᱸ ᱢᱮᱨᱚᱢ 
ᱥᱚᱸᱜᱨ ᱠᱟᱛᱮ ᱜᱩᱸᱜᱩᱫ ᱠᱟᱛᱮ ᱡᱟ.ᱛᱤ ᱫᱷᱚᱨᱚᱢ᱾

ᱟᱥᱨᱟ ᱠᱟᱛᱮ ᱵᱩᱨᱩ ᱜᱚᱫᱟᱢ ᱵᱤᱨ ᱢᱟ ᱜᱟᱡᱟᱨ 
ᱵᱚᱞᱚᱜ ᱦᱳᱭᱮᱱ ᱵᱟᱵᱟᱠ ᱟᱵᱚ ᱨᱮᱸᱜᱮᱡ ᱱᱟᱪᱟᱨ᱾
ᱟᱹᱭᱩᱨ ᱨᱮᱫᱚ ᱦᱮᱱᱟᱜ ᱠᱤᱱᱟ. ᱠᱟᱹᱱᱦᱩ ᱥᱤᱫᱩ
ᱥᱳᱛᱳᱜ ᱨᱮᱫᱚ ᱦᱮᱱᱟᱜ ᱠᱤᱱᱟᱹ ᱵᱷᱟᱭᱨᱳ ᱪᱟᱸᱫᱩ᱾
ᱫᱟᱲᱟᱱ ᱛᱮᱜᱮ ᱦᱮᱱᱟᱜ ᱵᱚᱱᱟ ᱥᱚᱯᱚᱜ ᱨᱚᱰᱚᱜ
ᱧᱟᱢᱟᱜ ᱠᱟᱱᱟ ᱩᱥᱩᱞ ᱵᱩᱨᱩ ᱜᱟᱰᱟ ᱥᱚᱰᱚᱜ᱾ 
ᱱᱮ-ᱜᱷᱟᱹᱲᱤ ᱫᱚ ᱛᱟᱹᱨᱩᱵ ᱵᱟᱱᱟ ᱵᱚᱛᱚᱨ ᱵᱟᱝᱟ
ᱵᱚᱛᱚᱨ ᱠᱟᱛᱮ ᱵᱷᱟᱜᱮ ᱴᱷᱟᱶ ᱫᱚ ᱚᱠᱟᱨᱮᱢ ᱧᱟᱢᱟ ?
ᱡᱚᱢ ᱠᱟᱛᱮ ᱵᱩᱨᱩ ᱨᱮᱭᱟᱜ ᱟᱢᱟᱜ ᱥᱟᱠᱟᱢ
ᱵᱮᱱᱟᱣ ᱟᱵᱚᱱ ᱱᱟᱪᱟᱨ ᱦᱚᱲᱟᱜ ᱱᱚᱣᱟ ᱱᱟᱜᱟᱢ᱾
ᱵᱟᱝ ᱡᱤᱞᱩᱜ-ᱟ ᱥᱮᱸᱜᱮᱞ ᱥᱳᱠᱳᱞ ᱥᱚᱵᱚᱨ ᱥᱚᱵᱚᱨ
ᱟᱵᱚ ᱦᱚᱸ ᱵᱚᱱ ᱛᱟᱦᱮᱸ ᱜᱚᱫᱚᱜ ᱚᱡᱨ ᱡᱷᱚᱵᱚᱨ᱾ 
ᱩᱛᱚᱨ ᱠᱷᱚᱱᱮ ᱫᱟᱜ ᱜᱚᱫᱽᱨᱮ ᱫᱚᱠᱷᱤᱱ ᱥᱮᱱᱟᱜ
ᱫᱟᱨᱮ ᱨᱮᱵᱚᱱ ᱫᱟᱱᱟᱝ ᱞᱮᱜᱟᱜ ᱰᱷᱚᱸᱰᱚᱨ ᱟᱱᱟᱜ᱾
ᱨᱟᱵᱟᱝ ᱛᱮᱠᱚ ᱛᱷᱟᱨ ᱛᱷᱟᱨᱟᱜ-ᱟ ᱴᱩᱠᱤᱨ ᱴᱩᱠᱤᱨ
ᱟᱡ ᱠᱟᱛᱷᱟᱢ ᱧᱟᱢ ᱟᱠᱟᱫ ᱵᱚᱱ ᱡᱚᱛᱚ ᱧᱩᱠᱩᱨ᱾

ᱨᱮᱸᱜᱮᱡ ᱡᱚᱠᱷᱚᱱ ᱨᱮᱸᱜᱮᱡ ᱵᱚᱱᱟ ᱟᱠᱟᱱ ᱡᱟᱲᱟᱵ
ᱱᱟᱝᱠᱟ ᱡᱚᱠᱷᱟᱱ ᱨᱟᱡᱚᱜᱠᱚ ᱫᱚ ᱠᱟᱲᱟᱵ ᱠᱟᱲᱟᱵ ᱾
ᱚᱠᱛᱚ ᱵᱟᱹᱱᱩᱜ ᱟᱹᱛᱩ ᱦᱚᱸ ᱵᱟᱹᱱᱩᱜ ᱟᱸᱜᱚᱡᱽ ᱨᱮᱭᱟᱜ
ᱫᱤᱥᱚᱢ ᱛᱟᱵᱚᱱ ᱮᱦᱚᱵ ᱟᱠᱟᱱ ᱦᱩᱛᱤ ᱪᱟᱭᱟᱜ ᱾
ᱨᱮᱸᱜᱮᱡ ᱡᱚᱠᱷᱟᱱ ᱨᱮᱸᱜᱮᱡ ᱵᱚᱱᱟ ᱟᱴᱟᱵ ᱠᱟᱲᱟᱵ
ᱱᱚᱝᱠᱟ ᱡᱚᱠᱷᱟᱱ ᱨᱟᱡᱚᱜ ᱠᱚᱫᱚ ᱠᱟᱲᱟᱵ ᱠᱟᱲᱟᱵ ᱾

ᱚᱠᱛᱚ ᱵᱟᱹᱱᱩᱜ ᱟᱹᱛ ᱦᱚᱸ ᱵᱟᱹᱱᱩᱜ ᱟᱸᱜᱚᱡᱽ ᱨᱮᱭᱟᱜ 
ᱫᱤᱥᱚᱢ ᱛᱟᱵᱚᱱ ᱮᱦᱚᱵ ᱟᱠᱟᱱ ᱦᱩᱛᱤ ᱪᱟᱭᱟᱜ ᱾
ᱱᱚᱝᱠᱟ ᱨᱮᱫᱚ ᱚᱠᱚᱭ ᱛᱟᱦᱮᱸᱱ ᱫᱩᱲᱩᱵ ᱦᱟᱯᱮ
ᱚᱠᱚᱭ ᱢᱮᱱᱟᱭ ᱱᱚᱝᱠᱟ ᱨᱮᱫᱚ ᱦᱟᱯᱮ ᱦᱟᱯᱮ ᱾
ᱟᱹᱫᱤᱵᱟᱹᱥᱤ ᱦᱚᱯᱚᱱ ᱡᱚᱛᱚ ᱢᱤᱫᱚᱜ ᱨᱮᱭᱟᱜ 
ᱚᱠᱛᱚ ᱱᱤᱛᱚᱜ ᱥᱮᱴᱮᱨ ᱟᱠᱟᱱ ᱳᱠᱳ ᱵᱟᱭᱟᱜ ᱾
ᱞᱚᱞᱚ ᱟᱠᱟᱱ ᱦᱚᱲᱢᱚ ᱢᱟᱭᱟᱝ ᱵᱚᱦᱚᱜ ᱢᱟᱭᱟᱝ 
ᱰᱷᱚᱬ ᱵᱤᱧ ᱦᱚᱸ ᱛᱮᱦᱮᱧ ᱫᱚᱠᱚ ᱦᱳᱭᱮᱱ ᱟᱭᱟᱝ᱾
ᱵᱟᱝᱵᱚ ᱥᱟᱦᱟᱣ ᱨᱤᱰᱚᱡ ᱨᱚᱰᱚᱡ ᱢᱟᱦᱟᱡᱚᱱᱟᱜ
ᱥᱟᱦᱟ ᱨᱮᱵᱚ ᱛᱟᱦᱮᱸᱱ ᱞᱟᱹᱜᱤᱫ ᱠᱤᱥᱟᱹᱬ ᱠᱷᱚᱱᱟᱜ ᱾
ᱵᱟᱝᱵᱚ ᱧᱟᱢᱟ ᱨᱟᱡᱟᱜ ᱫᱩᱞᱟᱹᱲ ᱨᱮᱸᱜᱮᱡ ᱱᱟᱪᱟᱨ 
ᱩᱱᱤ ᱨᱟᱡᱽ ᱫᱚ ᱪᱮᱫᱟᱜ ᱢᱟᱱᱚᱛ ? ᱪᱮᱫᱟᱜ ᱜᱚᱪᱟᱨ ?
ᱥᱚᱞᱚᱢ ᱞᱚᱴᱚᱢ ᱚᱪᱚᱭᱮᱫᱟᱢ ᱡᱟᱹᱛᱤ ᱫᱷᱚᱨᱚᱢ
ᱪᱟᱵᱟᱭᱮᱫᱟᱢ ᱱᱟᱪᱟᱨ ᱠᱚᱣᱟᱜ ᱡᱚᱛᱚ ᱫᱷᱚᱨᱚᱢ᱾
ᱵᱟᱝ ᱪᱟᱞᱟᱜ-ᱟ ᱡᱟᱦᱟᱸᱱ ᱠᱟᱛᱷᱟ ᱨᱮᱸᱜᱮᱡ ᱠᱚᱣᱟᱜ
ᱱᱟᱪᱟᱨ ᱠᱚᱣᱟᱜ ᱪᱮᱫ ᱠᱟᱛᱷᱟ ᱦᱚᱸ ᱵᱟᱝᱜᱮ ᱡᱚᱣᱟᱜ ᱾ 

ᱨᱮᱸᱜᱮᱡ ᱠᱚᱠᱚ ᱡᱚᱢ ᱚᱪᱚᱜ ᱠᱟᱱ ᱠᱤᱥᱟᱹᱬᱠᱚ ᱴᱷᱮᱱ 
ᱵᱟᱝ ᱜᱟᱱᱚᱜ-ᱟ ᱨᱟᱡᱚᱜᱠᱚ ᱴᱷᱮᱱ ᱪᱮᱫᱜᱮ ᱢᱮᱢᱮᱱ ᱾ 
ᱮᱠᱮᱱ ᱠᱤᱥᱟᱹᱬ ᱞᱟᱹᱴᱩ ᱦᱚᱲᱠᱚ ᱟᱹᱵᱽᱨᱩ ᱠᱟᱠᱚ ᱾
ᱳᱠᱳ ᱞᱟᱹᱜᱤᱫ ᱫᱤᱥᱚᱢ ᱫᱩᱞᱟᱹᱲ ᱥᱟᱠᱚᱣᱟ ᱛᱟᱠᱚ ᱾
ᱨᱟᱡᱚᱜ ᱠᱚᱦᱚᱸ ᱞᱟᱡᱠᱚ ᱫᱩᱦᱟᱸᱣ ᱨᱮᱸᱜᱮᱡ ᱠᱚᱣᱟᱜ 
ᱟᱡ ᱠᱟᱛᱷᱟᱭ ᱨᱮᱸᱜᱮᱡᱠᱚ ᱫᱚ ᱮᱠᱮᱱ ᱦᱚᱦᱟᱜ ᱾

ᱡᱚᱢ ᱠᱟᱛᱮ ᱪᱚᱝ ᱵᱟᱝ ᱠᱟᱛᱮ ᱪᱚᱝ ᱢᱩᱡᱠᱚ ᱞᱮᱠᱟ
ᱠᱟᱹᱢᱤᱨᱮ ᱵᱚᱱ ᱫᱷᱩᱨᱟᱹᱣ ᱠᱚᱜ-ᱟ ᱦᱚᱲᱠᱚ ᱛᱟᱠ-ᱟ ᱾
ᱠᱩᱠ ᱵᱟᱱᱟᱠᱚ ᱞᱟᱜᱟ ᱠᱟᱛᱮ ᱵᱤᱨᱢᱟ ᱜᱟᱡᱟᱲ
ᱴᱟᱺᱰᱤ ᱠᱟᱛᱮ ᱵᱮᱱᱟᱣ ᱟᱵᱚᱱ ᱟᱦᱟᱨ ᱰᱟᱦᱟᱨ ᱾
ᱡᱚᱢ ᱵᱮᱲᱟᱜᱮ ᱟᱨ ᱦᱚᱲᱠᱚ ᱞᱟᱦᱟ ᱦᱮᱡ-ᱮᱱ
ᱵᱟᱸᱫᱟᱢ ᱧᱮᱞᱟ ᱠᱩᱸᱭᱰᱤ ᱫᱟᱨᱮ ᱨᱮᱫᱚ ᱮ‌ᱠᱮᱱ ᱾ 
ᱱᱮ ᱦᱚᱲ ᱫᱚ ᱡᱟᱣᱜᱮ ᱟᱫᱚ ᱮᱠᱮᱱ ᱛᱤ-ᱜᱮ 
ᱠᱟᱹᱢᱤ ᱠᱟᱛᱮ ᱵᱟᱹᱱᱩᱜ ᱛᱟᱵᱚᱱ ᱟᱹᱣᱠᱟᱹᱨᱤ ᱜᱮ ᱾
ᱱᱮᱦᱚᱲ ᱫᱚ ᱡᱟᱣᱜᱮ ᱟᱫᱚ ᱮᱠᱮᱱ ᱛᱤ-ᱜᱮ᱾


ᱵᱚᱦᱚᱜ ᱛᱤᱨᱩᱵ ᱛᱟᱦᱮᱸᱱ ᱠᱷᱚᱱᱟᱜ ᱜᱩᱡᱩᱜ ᱵᱮᱥᱟ 
ᱦᱟᱹᱲᱩᱵ ᱠᱟᱛᱮ ᱜᱩᱡᱩᱜ ᱵᱮᱥᱟ ᱫᱤᱥᱚᱢ ᱦᱟᱥᱟ ᱾
ᱰᱟᱹᱱ ᱞᱮᱠᱟ ᱠᱚ ᱡᱮᱸᱵᱮᱫ ᱵᱚᱱᱟ ᱨᱟᱡᱚᱜᱠᱚ ᱫᱚ 
ᱱᱮ ᱱᱟᱦᱟᱪᱟᱨ ᱛᱤᱢᱤᱱ ᱫᱤᱱᱵᱚ ᱥᱟᱦᱟᱣ ᱟᱫᱚ ? 
ᱵᱚᱦᱚᱜ ᱵᱟᱵᱚᱱ ᱛᱤᱨᱩᱵ ᱜᱚᱫᱟ ᱛᱟᱯᱟᱢ ᱟᱵᱚᱱ
ᱫᱤᱥᱚᱢ ᱞᱟᱹᱜᱤᱫ ᱦᱮᱨᱮᱞ ᱦᱮᱨᱮᱞ ᱧᱟᱯᱟᱢᱟᱵᱚᱱ ᱾
ᱟᱹᱭᱩᱨ ᱨᱮᱫᱚ ᱦᱮᱱᱟᱜ ᱠᱤᱱᱟᱹ ᱠᱟᱹᱱᱦᱩ ᱥᱤᱫᱩ 
ᱥᱳᱛᱳᱜ ᱨᱮᱫᱚ ᱦᱮᱱᱟᱜ ᱠᱤᱱᱟᱹ ᱵᱷᱟᱭᱨᱳ ᱪᱟᱸᱫᱩ᱾
ᱥᱟᱰᱮᱭᱮᱱᱟ ᱜᱩᱸᱡᱽᱨᱮ ᱠᱟᱛᱮ ᱨᱮᱜᱽᱲᱟ ᱴᱟᱢᱟᱠ
ᱚᱨᱥᱚᱝ ᱢᱮᱥᱟ ᱟᱨᱦᱚᱸ ᱱᱚᱛᱮ ᱥᱟᱠᱚᱣᱟ ᱟᱢᱟᱜ ᱾
ᱥᱤᱠᱨᱤ ᱞᱮᱠᱟ ᱛᱮᱨᱟᱝ ᱠᱚᱢᱟ ᱯᱷᱟᱨᱟᱠ ᱠᱷᱚᱱᱟᱜ 
ᱠᱟᱹᱯᱤᱛᱮᱵᱚᱱ ᱦᱮᱞᱮᱡ ᱠᱚᱣᱟ ᱥᱟᱶᱨᱮ ᱦᱮᱱᱟᱜ ᱾
ᱵᱚᱦᱚᱜ ᱪᱟᱞᱟᱜ ᱪᱩᱯᱤ ᱪᱟᱞᱟᱜ ᱵᱟᱵᱚᱱ ᱵᱟᱛᱟᱣ
ᱟᱵᱚᱱ ᱨᱮᱭᱟᱜ ᱟᱹᱭᱫᱟᱹᱨᱤ ᱫᱚ ᱫᱮᱵᱚᱱ ᱦᱟᱛᱟᱣ᱾
ᱛᱤᱥ ᱨᱮᱦᱚᱸ ᱵᱟᱝ ᱟᱹᱭᱫᱟᱹᱨᱤ ᱫᱚ ᱠᱚᱭᱛᱮ ᱧᱟᱢᱚᱜᱟ
ᱠᱚᱭᱛᱮ ᱧᱟᱢᱚᱜᱟ ᱪᱮᱫ ᱦᱚᱸᱜᱮ ᱵᱟᱝ ᱫᱷᱮᱨᱫᱚ ᱫᱟᱢᱚᱜ ᱾
ᱚᱠᱟ ᱛᱮᱫᱚᱭ ᱩᱢᱩᱞ ᱠᱟᱵᱚᱱ ᱢᱟᱨᱟᱝ ᱵᱩᱨᱩ
ᱩᱱᱤ ᱜᱮᱥᱮ ᱟᱵᱚᱱ ᱨᱤᱱᱤᱡ ᱥᱚᱨᱮᱥ ᱵᱩᱨᱩ ᱾
ᱧᱩᱢ ᱠᱤᱱᱟᱹᱵᱚᱱ ᱢᱟᱨᱟᱝ ᱵᱩᱨᱩ ᱡᱟᱦᱮᱨ ᱮᱨᱟ
ᱧᱩᱢ ᱛᱨᱟᱜᱮ ᱡᱟᱦᱮᱨ ᱮᱨᱟ ᱫᱟᱲᱮᱭ ᱮ-ᱨᱟ ᱾
ᱥᱟᱹᱨᱫᱤᱭᱟᱠᱟᱱ ᱛᱟᱯᱟᱢ ᱨᱮᱵᱚᱱ ᱠᱷᱟᱸᱡᱚᱜ ᱜᱮᱭᱟ
ᱚᱠᱛᱚ ᱱᱟᱹᱯᱤᱛ ᱟᱵᱚ ᱫᱚᱵᱚᱱ ᱨᱟᱡᱚᱜ ᱜᱮᱭᱟ.!!