পৗউল জুঝৗর সরেনহাঃ জিয়ন কাথা / ᱯᱟᱹᱩᱞ ᱡᱩᱡᱷᱟᱹᱨ ᱥᱚᱨᱮᱱ / About Paul Jujhar Soren

আপাৎ - মুনসী পান্ডু সরেন

আয়ো - মৗকু ( পৗরিস বাং বাডায় আকানা )

জানাম -২৯/১২/১৮৯২ - ১৯/০২/১৯৫৪

অনলিয়ৗ পৗউল জুঝৗর সরেন দ ঝাড়খণ্ড রাজস্টি রেযাঃ পাকুড় জিলৗ আর পাকুড়িয়ৗ থানারে মেনাঃ চুনপাড়া আতোরেনে তাহেঁকানা। উনি দ ১৮৯২ সাল রেয়াঃ ২৯ ডিসেম্বর নোওয়া ধুড়িধৗরতি রেয়াঃ পৗহিল মার্শালে ঞেঁললেদা। উনিরেন জানাম দাতাওয়াঃঞুতুম দ মুনসী পান্ডু সরেন আর তোওয়া দারেতায় আঃ ঞুতুম দ মৗকু (পৗরিস বাং বাডায় আকানা) তাহেঁকানা। গড়ম হাড়ামাঃ ঞুতুম দ তাহেঁকানা পেকো সরেন। উনি দ পারগানা হড়ে তাহেঁকানা। আপাততেঃৎ দ প্রাইমারী ইস্কুলরেন চেচেঃৎ মাহাশয়ে তাহেঁকানা।

অলঃ অৗঁকিল:- পৗউল জুঝৗর সরেন আঃ অলঃ অৗকিল দ আতো রেয়াঃ ইস্কুল

খন এত হব লেনা । আতো ইস্কুলরে অলঃ পাড়হাওয়ে পুরৗউকেঃৎ তায়ম্, উনি দ দুমকা জেলা হাইস্কুলরেয় ভৗর্তি এনা। ১৯১১ সালরে উনি দ ওন্ডে খন মেট্রিক বিডাউয়ে পাশ কেদা। ইনৗ তায়ম উনি দ কোলকাতা রেয়াঃ সেন্ট পলস্ কলেজতেয় উচৗড়েনা। ওনা কলেজ খন ১৯১৩ সালরে আই. এ পাশ কাতেয় ওন্ডং এনা। চেতান স্যেচ্ পাড়হাঃ রেয়াঃ মনে তাহেঁকান তায়রেই ঘাঁরঞ্জ জিয়ন রেয়াঃ আয়মা লেকান মুশকিলাঃকো খৗতির অলঃ- জিয়ন দয় মুচীৎ কেদা।

আপাসুলঃ জিয়ন:-

অলঃ পাড়হাও মুচৗৎ তায়ম্ উনি দ বিহার সরকারাঃ চেমাঃৎ বিভাগরে ১৯১৫ সালরে Sub-Inspector of Santal Schools হুদৗরে চাকরিয় ঞাম কেদা। ওনা বিভাগরে উনি দ ১৯১৫ খন ১৯৪৬ সাল হৗবিঃচয়ে তহেঁকানা। সরেন মাহাশয় দ বিশেষকায়তে জামতাড়া সান্তাল ইস্কুলকোরেন ইন্সপেক্টরে তাহেঁকানা। ১৯৪৩ সাল খন পাটনা বিশ্ববিদ্যালয় রেয়াঃ সান্তাল পাড়হাঃ বৗহসিরেন রৗসিয়ৗয় তাহেঁকানা।

অলবেল কৗমি:

পাউল জুঝৗর সরেন অলাঃ অনড়হেঁ পুথি 'বাহা ডালওয়াঃ' দ ১৯৩৬ সালরে বেনাগাড়িয়ৗ মিশন প্রেস খন ছাপা সদর আকানা। নোওয়া পুথি দ রোমান হারপতে ছাপাওয়াঃ কানা। উনি অলাঃ নোওয়া পুথি দ নিত হৗবিঃচতে বাডায় ঞাম আকান লেকা পৗহিল উতৗর অনড়হেঁ পুথি কানা।

নওয়া পুথিরে জতরে ১৭ গটেন অনড়হেঁ সেলেঃৎ আকানা। ইনৗ তায়ম্ ওনা পুথি দ ১৯৪৩ সালরে দোসার ধাও ছাপা দহড়াও আকানা। দোসার ধাওআঃ পুথিরে দ আয়মাগে নাঁওয়া অনড়হেঁকো সেলেঃৎ আকানা।

মানোতান পাউল জুঝৗর সরেন দ অনড়হিঁয়ৗ লেকাতে জৗসতিকায়বোন বাডায় আকাদেয়া। মেনখান উনি দ আয়মাগে গায়ান কৗহনি আর অনলকোয় অল আকাদা। আঃচ্ জিওয়েঃৎ তাহেন ভোর ওনা পুথিকো দ বায় ছাপা সদর ওটো আকাদা। নিতঃ ওনাকো পুথি রেয়াঃ পান্ডুলিপি অকয়কো ঠেন মেনাঃআ ওনা রেয়াঃ যাহান তোলাসগে বাং বাডায় আকানা। সান্তালি সাহিত্য রেয়াঃ ইতিহাসরে 'বাহা ডালওয়াঃ' পুথি দ পৗহিল উতৗর নিছরা অনড়হেঁ পুথি কানা। নোওয়া পুথিরে দ হড়-সমাজ লাহায় রেয়াঃ কাথা, সমাজ সুসৗর আর ইশরাঃ মাহিমাগে জৗসতিকায়তেয় অল রাকাপ্ আকাদা।

সান্তালি পৗরসি চেতানরে উনিয়াঃ দ আডি দায়া দুলৗড় তাঁহেকান তায়া। পৗরসি সাহিত্য হারা বুরুইরে উনি দ অৗডিগেয় কুরুমুটু আকাদা। "বাহা ডালওয়াঃ” রেয়াঃ বিনতিরে ওকায় অল আকাৎ ওনাবোন পাড়হাও লেখান ওনা রেয়াঃ দবন বাডায় দাড়েয়াঃআ। নোওয়া দ বিন-দিগ্ধৗতে মেন গানঃআ উনিয়াঃ বাগদাও আকান অলকো বোন ক্রামলেতায় খান সান্তালি সাহিত্য বাগওয়ান দ সোহান জুটিঃকঃ আ।

দিসম সুসৗর কৗমি:-

সরকারী নুকরি জিয়ন খন জিরৗউয়েন তায়ম্ সরেন মাহাশয় দ ভারত দিসম রেয়াঃ ফুরগৗল লাড়াওনারেয় সেলেঃৎ লেনা। ইংরেজ রাজআঃ গবল খন ভারত দিসম দ ফুরগৗলেনা। ইনৗ তায়ম্ ১৯৫২ সালরে ভারত দিসম রেয়াঃ পৗহিল উতৗর লোকসাভা ভোটরে উনি দ M.P লেকাতেয় বাছাও ওচোয়েনা। ইনৗ তায়ম্ রাজধৗনী দিল্লীতেয় সেনেনা। লোকসাভারেন রৗসিয়ৗয় তাঁহেকান অক্তে উনি দ আয়মা লেকান সামাজিয়ৗ উৎনৗউ কৗমিকো সালাঃ জনড়াওয়ে তাঁহেকানা। MP তাঁহেন অক্তেরেগে ১৯৫৪ সাল রেয়াঃ ১৯ ফেব্রুয়ারী দিল্লী রেয় হানা পুরিয়েনা।

✍️- দিলীপ হেমব্রম